Am y tro cynta ers dros chwarter canrif, mae anturiaethau Tintin unwaith eto ar gael yn Gymraeg, mewn addasiadau newydd sbon o’r Ffrangeg gwreiddiol ar gyfer cenhedlaeth newydd o ddarllenwyr, gan gychwyn gyda Mwg Drwg y Pharo.

Mae degau o Eifftolegwyr wedi ceisio dod o hyd i feddrod coll y Pharo Cih-Osgh, ond diflannu o wyneb y ddaear bu ffawd pob un ohonyn nhw. Ar ôl cyfarfod â’r Eifftolegydd ecsentrig, yr Athro Philemon Ananaeas, mae Tintin a’i gi ffyddlon Milyn hefyd yn cael eu hunain yn chwilota am y feddrod – cyn darganfod bod bedd y Pharo yn cynnwys cyfrinach sy’n llawer mwy arswydus na thywod a mymis. Wrth ddod o hyd i gliw dirgel ar fandyn sigâr, mae Tintin a Milyn yn mynd benben â chiwed o smyglwyr cyffuriau, yn mynd ar siwrne syfrdanol drwy Arabia a’r India, ac yn syrthio’n bendramwnwgl i frwydr ddeallusol yn erbyn dihiryn rhyngwladol.